Í morgun voru lesendur Mannlífs spurðir hvort þeir væru sammála þeirri ákvörðun að opna skóla landsins á hefðbundnum tíma, þrátt fyrir sögulegan fjölda innanlandssmita undanfarið. Lesendur voru spurðir:
„Ert þú sammála ákvörðun ráðherra um að opna skólana þrátt fyrir fjölda smita?“
Flestir voru ósammála opnun skóla landsins, eða tæplega 73 prósent svarenda. Langt fyrir neðan eru þeir sem eru sammála ákvörðuninni, eða tæp 20 prósent. Einungis tæp 8 prósent voru sammála opnun skólanna, en hefðu viljað sjá frekari takmarkanir á starfinu.
Flestir grunnskólar landsins opnuðu í dag. Ljóst er að skiptar skoðanir eru á þeirri ákvörðun að fresta ekki upphafi skólastarfsins en Þórólfur Guðnason, sóttvarnalæknir hafði lagt það til í minnisblaði sínu til heilbrigðisráðherra. Ríkisstjórnin ákvað að fylgja ekki þeim ráðleggingum. Sú ákvörðun hefur verið harðlega gagnrýnd, meðal annars af kennurum landsins.
