Snorri vill verða næsti formaður Sjálfstæðisflokksins: „Heimurinn stendur á barmi örvæntingar“

Snorri Ásmundsson vill verða næsti formaður Sjálfstæðisflokksins.

Listamanninum Snorra Ásmundssyni er ekkert heillagt en hann hefur tekið upp á hinum og þessum gjörningum í gegnum tíðina en nú segist hann vilja leiða Sjálfstæðisflokkinn „inn í betri tíð og hefja flokkinn aftur á flug“ sem nýr formaður flokksins. Virðist hann þannig gera ráð fyrir því að Bjarni Benediktsson hætti brátt sem formaður Sjálfstæðisflokksins en hann sagði af sér ráðherraembætti í dag. Snorri, sem árið 2009 bauð sig fram gegn Geir Haarde í formannskosningum flokksins, sendi frá sér tilkynningu rétt í þessu. Lesa má hana hér fyrir neðan:

„Heimurinn stendur á barmi örvæntingar og leiðtogar að missa máttinn og á slíkum tímamótum þarf heimurinn nýja og hamingjusama leiðtoga til að forða heiminum út úr ógöngum.

Í ljósi sögunnar og í ljósi “óvæntra” atburða er ég tilbúinn til að leiða flokkinn inn í betri tíð og hefja flokkinn aftur á flug og þjóðina alla með í taumi inn í ævintýralegan umsnúning úr efnislegum forarpitt inn í andlegar allsnæktir.

Ég er fullviss um ágæti mitt og hæfileika til að snúa dæminu við. Verum þakklát, góð og glöð, leggjum frá okkur símanna og fögnum lífinu. Elskumst og sýnum hvort öðru virðingu og ást.

Ég er tilbúinn, eru þið tilbúinn?“