Eins og greint var frá í gær átti sér stað alvarlegt bílslys á Grindavíkurvegi sem endaði með því að tveir létust. Einstaklingarnir sem létust bjuggu í Sandgerði og ríkir mikil sorg í bæjarfélaginu og má sjá marga þar í bæ flagga í hálfa stöng. Í yfirlýsingu frá Steypustöðinni er greint frá því að ökutæki á vegum þeirra hafi rekist saman í hálku við annan bíl með þeim afleiðingum að fólkið í hinum bílnum lést. Þá var ökumaður Steypustöðvarinnar fluttur til aðhlynningar. Steypustöðin segir að þetta sé mikill sorgardagur í sögu fyrirtæksins og harmar atburðinn.
Hægt er að lesa alla yfirlýsinguna hér fyrir neðan:
„Í gær, föstudaginn 5. janúar, varð sá hörmulegi atburður á Grindavíkurvegi að tveir bílar rákust saman í hálku og var annað ökutækið á vegum Steypustöðvarinnar. Eins og komið hefur fram voru ökumaður og farþegi hins ökutækisins úrskurðuð látin á vettvangi, en ökumaður Steypustöðvarinnar fluttur til aðhlynningar á Heilbrigðisstofnun Suðurnesja.
Gærdagurinn var mikill sorgardagur í sögu Steypustöðvarinnar og er starfsfólk okkar harmi slegið vegna atburðarins. Hugur okkar er hjá aðstandendum hinna látnu, þar sem margir eiga nú um sárt að binda. Sem stendur leggjum við áherslu á að hlúa að starfsfólki okkar, þar sem öllum er mjög brugðið. Aðhlynning okkar á ekki síst við um ökumanninn sem var við störf á vegum félagsins. Við vinnum einnig með þeim aðilum sem koma að rannsókn slyssins til að veita allar tiltækar upplýsingar sem við mögulega getum.
F.h. Steypustöðvarinnar ehf.,
Björn Ingi Victorsson, forstjóri.“