Spáir því að Sigmundur Davíð komi inn í næstu rík­is­stjórn

Bæjarstjórinn í Ölfusi er þeirrar skoðunar að formaður Miðflokksins verði með í næstu ríkisstjórn.

Elliði Vign­is­son, bæj­ar­stjóri í Ölfusi og fyrr­ver­andi odd­viti Sjálf­stæðisflokksins í Vest­manna­eyj­um, telur að Sig­mund­ur Davíð Gunn­laugs­son, formaður Miðflokks­ins og fyrr­ver­andi for­sæt­is­ráðherra, komi til með að verða í næstu rík­is­stjórn Íslands.

Þessu lýsir Elliði yfir á Facebook-síðu sinni þar sem heilmiklar ummræður hafa skapast um Kryddsíldina sem sýnd var á Stöð 2 á gamlársdag og hvaða stjórnmálaleiðtogar hafi staðið sig best í þættinum. Sjálfur er Elliði þeirrar skoðunar að Katrín Jakobsdóttir, forsætisráðherra og formaður Vinstri grænna og Bjarni Benediktsson, fjármálaráðherra og formaður Sjálfstæðisflokksins hafi komið þar best út, en þegar á það er bent að Sigmundur Davíð hafi einnig komið vel út tekur Elliði undir þau orð. „Sam­mála, hann kem­ur inn í næstu rík­is­stjórn,“ ritar hann í athugasemd við eigin færslu.

Þess má geta að Miðflokkurinn mældist með 12,7% fylgi samkvæmt Þjóðar­púlsi Gallup sem greint var frá á RÚV á dögunum og er því þriðji stærsti flokkur á Alþingi. Með hliðsjón af niðurstöðu Þjóðarpúlsins héldi núverandi ríkisstjórn Vinstri grænna, Framsóknar og Sjálfstæðisflokki ekki velli ef nú yrði gengið til kosninga, en þingkosningar fara fram á næsta ári.

Mbl.is greindi fyrst frá.