Bjarni Jónsson, alþingismaður Vinstri grænna, íhugar að hætta í flokki sínum. Hann hefur rætt þau mál við nána bandamenn sína. Endanlegrar ákvörðunar hans og yfirlýsingar er að vænta innan stundar.
Bjarni er leiðtogi flokksins í Norðvesturkjördæmi og brotthvarf hans yrði mikið áfall fyrir forystu flokksins. Heimildir Mannlífs herma að hann hafi lengi verið ósáttur við stefnu flokksins í ýmsum málum. Á milli hans og Svandísar Svavarsdóttur formanns er að sögn djúp gjá.
Bjarni er fæddur 6. júní 1966. Hann hefur verið alþingismaður Norðvesturkjördæmis síðan árið 2021. Áður var hann varaþingmaður Norðvesturkjördæmis. Bjarni er sonur Jóns Bjarnasonar, fyrrverandi sjávarútvegráðherra, og bróðir Ásgeirs Jónssonar seðlabankastjóra.
Bjarni vildi ekkert láta hafa eftir sér í morgun þegar Mannlíf ræddi við hann en staðfesti að ágreiningur hafi verið lengi um stefnu flokksins. Samkvæmt heimildum Mannlífs mun hann ekki hætta í pólitík. Hann hefur verið orðaður við framboð hjá Miðflokknum en vildi ekki tjá sig um það mál eða hvað taki við ef til úrsagnar hans kemur.
Uppfært: Bjarni tilkynnti um úrsögn sína úr VG á fundi Landssambands smábátaeigenda rétt í þessu.