Stefán Pálsson segist vona að mótmælunum í Reykjavíkurhöfn ljúki með „glans“ í stað þess að aktivistarnir gefist upp „úrvinda um miðja nótt“
„Átti leið um höfnina og kíkti á hvalveiðibátana. Í mínum huga er þetta öflug mótmælaaðgerð og þegar gríðarlega vel heppnuð. Ég fylgist með atburðarásinni og sé tvær sterkar ungar konur sem hafa náð að setja strik í reikninginn hjá ríku og valdamiklu fyrirtæki og slá lögregluna út af laginu.“ Þannig byrjar færsla Stefáns Pálssonar, sagnfræðings, bjórsérfræðings og spurningameistara Íslands. Og hann heldur áfram: „En krafa samtímans er að allir séu fórnarlömb og þess vegna virðist fókusinn hjá mörgum þeirra sem fjalla um mótmælin vera sá að konurnar í eftirlitstunnunum séu fórnarlömb lögregluofríkis, þyrstar, sveltar og í stórhættu.“ Stefán segist ekki skilja þá nálgun og vonar að „mótmælendurnir séu að plana hvernig þær geti lokið aðgerðunum með sem mestum glans og á sínum forsendum“
Eva Hauksdóttir lögmaður og einn þekktasti aktivisti Íslands tekur undir orð Stefáns í færslu á Facebook. „Tek undir með Stefáni. Ekki fórnarlambsvæða aktívisma. Fyrir utan það hvað fórnarlambshyggja er þrautleiðinleg, klámkennd og laus við reisn, þá er bara samkeppnin um verðlaunasæti bàgindanna svo gífurleg að það borgar sig ekki að spila út slíkum trompum.“