Útvarpsstjórinn yfirgefur RÚV þegar skipunartíma hans lýkur. Stefán Eiríksson útvarpsstjóri tilkynnti það í Bítinu í morgun að hann muni ekki sækjast eftir áframhaldandi starfi þegar skipunartími hans rennur út en slíkt mun gerast eftir um það bil eitt og hálft ár. Stefán bætist þá við langan lista fólks sem hefur yfirgefið RÚV á skömmum tíma.
„Ég hef bara hugsað þetta sem fimm ára verkefni. Ég hef hugsað þetta þannig. Ég hef verið um það bil fimm til tíu ár á hverjum stað. Mér finnst það hæfilegt og eðlilegt fyrir stjórnanda; bæði fyrir viðkomandi sjálfan og ekki síður fyrir viðkomandi stofnun eða rekstur,“ sagði Stefán í Bítinu um málið. Hann sagðist þó ekki hafa rætt málið við stjórn RÚV ehf.
Stefán hefur sætt harðri gagnrýni sem útvarpsstjóri úr mörgum áttum. Hann hefur meðal annars neitað að tjá sig um meint skattalagabrot Sigríðar Daggar Auðunsdóttur fréttamanns. Hörð gagnrýni hefur dunið á Stefáni vegna byrlunarmáls Páls Steingrímssonar þar sem Ríkisútvarpið kom við sögu við að brjóta upp og afrita síma sjúklingsins. Þá hefur Brynjar Níelsson, fyrrverandi þingmaður, gagnrýnt RÚV harðlega og sagt skattgreiðendur fái ekki mikið fyrir sinn snúð þegar kemur að fjölmiðlarisanum.