Sagnfræðingurinn Stefán Pálsson er mjög spenntur fyrir forsetakosningum í Bandaríkjunum eins og margir aðrir í heiminum en fáir jafn mikil mótandi áhrif á heiminn og forseti Bandaríkjanna. Sérfræðingar og greinendur eru ekki sammála um hvort að Donald Trump, fyrrverandi forseti Bandaríkjanna, eða Kamala Harris, varaforseti Bandaríkjanna, muni sigra en Stefán telur sig vita hvað muni gerast.
„Ohh… það eru kosningar í BNA á morgun og ég veit nákvæmlega hvað mun gerast,“ skrifar varaborgarfulltrúinn um kosningarnar í færslu á samfélagsmiðlinum Facebook. „Ég kem heim úr bumbuboltanum og sest niður við tölvuna. Þá verður búið að telja atkvæðin úr einhverju 12 manna þorpi í New Hampshire sem alltaf er á undan öðrum. Svo rífressa ég einhverjar fréttasíður og ákveð að bíða eftir fyrstu tölum. Þær verða mjög ófullnægjandi og ég ákveð að bíða í klukkutíma í viðbót, auk þess sem ég sé ekkert að fara að sofna strax eftir boltann. Þegar þær tölur koma loksins er allt enn mjög óráðið og ég nýbúinn að opna bjórflösku, svo ég ákveð að hinkra eftir næstu tölum og kalla þetta svo gott…. og svo koll af kolli og allt í einu er klukkan orðin 4:30, úrslitin enn á huldu en ég skríð í bælið alltof seint og er svo ónýtur í tvo daga á eftir. Ég verð þreyttur og miður mín bara við tilhugsunina.“
