Steinunn Ólína Þorsteinsdóttir leikkona er harðorð í nýrri Facebook-færslu sem hún skrifar við frétt um Katrínu Jakobsdóttir forsætisráðherra sem ætlar að skipa starfshóp gegn hatursorðræðu.
Segir Steinunn Ólína að hatursorðræða verði ekki upprætt öðruvísi en með mannúðlegri stefnu stjórnvalda í málefnum flóttafólks. Þá kallar hún Katrínu versta og þröngsýnasta heimalninginn.
„Yfirdrepsskapur 101
Hatursorðræða verður ekki upprætt í starfshópum heldur með mannúðlegri stefnu stjórnvalda í málefnum þeirra sem hingað koma. Vinsamlegast sparaðu þér og okkur ómakið Katrín. Þetta er gjörsamlega ótrúverðugt og menningarsnautt snakk. Það er ekki hægt að boða eitt en gera annað. Þú stjórnar ríkisstjórn sem er skipuð hræddum, kúltúrlausum og þjóðernissinnuðum dómsmálaráðherra og því miður hefur það sýnt sig að þú ert litlu skárri og kannski bara versti og þröngsýnasti heimalningurinn sjálf. Þín ríkisstjórn opnar allar æðar fyrir geysandi útlendingaandúð og fyrir það verður þín minnst sem og glimmrandi menntaskólaframsögu um nákvæmlega ekki neitt.“
Er færslu Steinunnar tekið vel en fjöldi hefur líkað við hana og margir skrifað athugasemdir. Einn af þeim sem hefur deilt færslunni er Illugi Jökulsson fjölmiðlamaður. Með deilingunni skrifar hann „tek undir hvert orð hjá Steinunni Ólínu hér. Katrín verður að hætta. Hún er farin að þvælast svo mikið fyrir.“