Stórfyrirtæki rekur 23 starfsmenn á Blönduósi vegna sparnaðar – Hagnaðist um 400 milljónir

Kjarnafæði Norðlenska hefur rekið 23 starfsmenn sláturhússins SAH Afurða, sem það á og rekur, á Blönduósi en fyrirtækið tilkynnti starfsmönnum það á föstudaginn. RÚV greindi frá þessu.

„Við munum gera allt sem í okkar valdi stendur til þess að draga úr neikvæðum áhrifum þessa og áttum gott samtal við fólkið okkar á föstudaginn og munum halda því samtali áfram,“ sagði Ágúst Torfi Hauksson, framkvæmdastjóri Kjarnafæði Norðlenska, um hvort einhverjir starfsmenn eigi mögulega að fá vinnu annars staðar innan fyrirtæksins. „Það liggur alveg fyrir að við erum þokkalega stórt fyrirtæki með margt fólk í vinnu og það er pláss fyrir gott fólk innan okkar raða.“

Þá staðfesti Ágúst að starfsmennirnir hafi verið reknir í sparnaðarskyni en fimm starfsmenn héldu vinnunni.

„Hugur okkar er náttúrlega fyrst og fremst hjá fólkinu okkar og íbúum okkar sem voru að missa vinnu út af þessum uppsögnum,“ segir Pétur Arason, sveitarstjóri Húnabyggðar.

Samkvæmt Viðskiptablaðinu hagnaðist Kjarnafæði Norðlenska um 403 milljónir árið 2023 en Kaupfélag Skagfirðinga keypti fyrirtækið í fyrra.