Fram kemur í dagbók lögreglunnar í dag að sumarhitinn virðist hafa farið misvel í fólk. Til að mynda hafi borist tilkynning um strípaling fyrir utan versluna í Kópavogi en þegar lögreglu bar að garði var engan slíkan að finna.
Þá var aðila hent út úr strætisvagni eftir að hafa neitað að greiða fyrir farið og neitað að fara úr vagninum þegar vagnstjórinn vísaði honum út.
Tveir voru kærðir í dag fyrir akstur undir áhrifum fíkniefna og einn fyrir að keyra en hann hafði áður verið sviptur ökuréttindum.
Tilkynnt var um eld í vinnuvél í Hafnarfirði. Stjórnandi vinnuvélarinnar náði að slökkva eldinn áður en viðbragðsaðila bar að garði, en hann hlaut minniháttar brunasár.
Þá var tilkynnt um harmonikkuspilara í miðborginni, sem hvorki hefði burði til að halda tón né lagi. Sendi lögregla á vettvang einn af sínum tónvísari liðsmönnum og annálaðan smekkmann, til að sannreyna hvort þessar alvarlegu ásakanir ættu við rök að styðjast. „Verða gæði þess sem fyrir eyru bar ekki tíunduð hér, af gefnu tilefni,“ eins og það var orðað í dagbókinni góðu.