Mjöll Matthíasdóttir, formaður Félags grunnskólakennara kannast ekki við að börn fólks í samninganefnd ríkisins séu nemendur í þeim átta skólum sem kosið er nú um hvort loka þurfi vegna verkfalla kennara.
Mannlífi barst ábending þar sem fullyrt var að þeir átta skólar sem valdir hafa verið fyrir verkföll kennara og kosning stendur nú yfir um, séu skólar þar sem börn fólks í samninganefnd ríkisins ganga í. Þetta vill Mjöll Matthíasdóttir, formaður Félags grunnskólakennara ekki kannast við. „Ég dáist nú bara að hugmyndarflugi fólks, það verð ég bara að segja“ svaraði hún Mannlífi hlæjandi og bætti við „Nei, ég kannast ekki við að það hafi verið horft til neins slíks.“ Aðspurð hvernig skólarnir átta voru valdir svaraði hún: „Það er bara innanhússákvörðun hér og verður ekki gefið upp.“
Mannlíf spurði Mjöll hvort henni þætti það siðferðislega rétt að velja ákveðinn hóp barna og unglinga til þess að verða fyrir verkfalli kennara, í stað þess að öll börn lendi í því eins og verið hefur áður svaraði hún: „Við erum bara í kjarabaráttu og ákváðum að beita þessari leið núna.“
Ekki náðist í Magnús Þór Jónsson, formann KÍ við gerð fréttarinnar.