Í dag eru tannlækningar barna á Íslandi foreldrum að kostnaðarlausu, utan sérstakra undantekninga. Einungis er greitt komugjald einu sinni á ári, sem er 2.500 krónur. Sum börn skila sér þó illa til tannlæknis hér á landi. Samkvæmt upplýsingum frá nokkrum íslenskum tannlæknum er um að ræða börn í ákveðnum hópum, en einna helst nefndu þeir börn sem eiga erlenda foreldra sem flutt hafa hingað til lands. Svo virðist því sem upplýsingar um greiðsluþátttökukerfið nái illa til ákveðinna hópa innan samfélagsins. Þetta segja tannlæknar að verði að breytast, til heilla fyrir börnin í landinu.
Erfitt getur reynst fyrir erlenda foreldra að átta sig á kerfinu hér á landi og skilja hvernig greiðsluþátttökukerfi er háttað. Sumir þeirra óttast ófyrirséðan kostnað og aðrir hafa hreinlega ekki hugmynd um að tannlæknaþjónusta bjóðist öllum börnum – endurgjaldslaust.
Grein um fyrirkomulag tannlækninga barna á Íslandi, þar sem niðurgreiðslukerfi Sjúkratrygginga er útskýrt, auk þess sem rætt er við íslenskan tannréttingarsérfræðing, má í heild sinni lesa í nýjasta helgarblaði Mannlífs, hér.