Telma Lucinda Tómasson svarar fyrir gagnrýni kennara vegna viðtals sem hún tók við formann Kennarasambands Íslands á Stöð 2 en hún segir engan hafinn undir gagnrýni.
Athygli vakti þegar Telma L. Tómasson, fréttaþulur á Stöð 2, tók viðtal við Magnús Þór Jónsson um kennaraverkfallið sem er í gangi en mörgum þótti hún vera helst til of ágeng í spurningum sínum. Einn af þeim sem gagnrýndi hana var kennarinn Ragnar Þór Pétursson sem skrifaði færslu á Facebook þar sem hann benti á að Telma ætti barnabarn í leikskóla sem er í verkfalli og sé því ekki hlutlaus og kallaði hana „reiðu ömmuna“.
Mannlíf heyrði í Telmu og spurði hana út í gagnrýnina. Sagðist hún fagna allri umræðu og að enginn sé hafinn yfir gagnrýni, hvorki hún né kennarar:
„Ég fagna allri umræðu. Við búum í lýðræðisríki og erum svo lánsöm að mega tjá okkur um hvaðeina. Enginn er hafinn yfir gagnrýni, hvorki ég né kennarar. Og allir þurfa að geta tekið henni. Fjölmiðlafólk spyr spurninga sem það telur að almenningur kunni að vilja spyrja um. Svo kann fólk að hafa misjafna skoðun á því hvernig það er gert, sem er jákvætt og fjölgar sjónarmiðum í umræðunni.“