„Nauðgun er einn alvarlegasti glæpur sem um getur. Hryllilegur glæpur. Tilhæfulausar ásakanir um nauðgun eru líka hryllilegur glæpur,“ segir Frosti Logason í viðtali við Reyni Traustason. Þar ræða þeir um þá baráttu sem Frosti hefur mátt heyja eftir alvarlegar ásakanir frá fyrrverandi kærustu sinnar og fyrrum þáttastjórnanda og baráttukonunni Eddu Falak.
Í viðtalinu gengst Frosti við því að hafa átt í óheilbrigðum samskiptum við sína fyrrverandi. Hann greinir jafnframt frá því að hann hefur ítrekað reynt að fá sátt í málinu en þá hefur honum verið mætt af Eddu Falak, sem hefur gengið svo langt að ljúga upp á hann nauðgun.
„Að saka saklausa menn um nauðgun, ég á bara ekki til orð yfir það,“ segir Frosti Logason.
Frosti lýsir að í kjölfar viðtals, fyrrverandi kærustu sinnar hjá Eigin konum, hvernig þáttastjórnandinn Edda Falak hafi borið út um hann skít og lygar á Twittersíðu sinni. Þar á meðal og án frekari málalenginga að Frosti hafi nauðgað.
„Ég gerði mér grein fyrir því þá þegar ég sá þetta við hvað var að eiga. Þetta væri óheiðarlegt, útplottað og skipulögð árás.“
Reynir þáttastjórnandi kemur með innskot í viðtalið og deilir því hvernig hann hafi sjálfur orðið fyrir barðinu á óheiðarleika og lygum Eddu Falak, og að hún hafi logið upp á Reyni í Twitterfærslu að hann hafi sagt það henni sjálfri að kenna að henni hafi verið nauðgað.
„Þetta sagði mér allt um manneskjuna,“ bætir Reynir við.
Aðspurður í viðtalinu af hverju slegið sé á sáttarhöndina svarar Frosti: „Ef sátt myndi fást í málið er slaufunin í uppnámi. Markmiðið er bara að taka fjölskyldumann með konu og börn úr umferð – og að hann fái ekki uppreisn æru.“
Hér má sjá viðtalið í heild: