Tóku bangsa með í þyrluferð Landhelgisgæslunnar: „Lóa aðstoðaði við eftirlit um landið og miðin“

Landhelgisgæslan birti krúttfærslu ársins á heimasíðu sinni í gær.

Á heimasíðu Landhelgisgæslunnar má oft sjá fréttir af afrekum Gæslunnar eða viðburðum sem hún tekur þátt í en í gær birtist öðruvísi færsla og verður að viðurkennast að hún er í krúttlegri kantinum.

Sex ára dóttir eins þyrluflugstjóra Gæslunnar stóð frammi fyrir erfiðu vali í gær, samkvæmt færslunni. Þannig var mál með vexti að bangsastund var í skóla dótturinnar í gær og þurfti hún að velja á milli bangsanna Manna og Lóu, um það hvort þeirra fengi að fara með henni í skólann en hún gat ekki með nokkru móti gert upp á milli þeirra.

Að lokum fór svo að Manni fór með stúlkunni í skólann en Lóa með pabba hennar í þyrluna. „Lóa aðstoðaði við eftirlit um landið og miðin og fékk að fylgjast með ansi viðburðaríkum degi um borð í þyrlunni.“