Tökum á þáttaröðinni Systraböndum lauk um helgina. Þættirnir, sem eru framleiddir af Sagafilm, verða sýndir í Sjónvarpi Símans Premium á næsta ári.
Þættirnir eru skrifaðir af Björgu Magnúsdóttur, Jóhanni Ævari Grímssyni, Jóhönnu Friðriku Sæmundsdóttur og Silju Hauksdóttur sem sá einnig um leikstjórn.
Meðal leikara í þáttaröðinni eru Ilmur Kristjánsdóttir, Jóhanna Friðrika Sæmundsdóttir, Lilja Nótt Þórarinsdóttir, Halldóra Geirharðsdóttir og Jónmundur Grétarsson.
„Þegar beinagrind unglingsstúlku finnst á Snæfellsnesi er fundurinn fljótlega tengdur við hvarf fimmtán ára gamallar stúlku árið 1995. Þegar farið er að grafa í málinu þurfa þrjár uppkomnar vinkonur að horfast í augu við drauga fortíðar,“ segir í tilkynningu um þættina. Þar segir einnig að tökur hafi gengið vel en þlr hófust í lok maí.
Þáttaröðin samanstendur af sex þáttum og verða sýndir í Sjónvarpi Símans og á Viaplay á næsta ári.