Búið er að finna töskurnar sem stolið var úr peningaflutningsbíl við Hamraborg í gærmorgun. Litasprengjur voru í töskunum.
Sjá einnig: Lögreglan leitar að tveimur þjófum sem stálu úr verðmætaflutningabíl
Samkvæmt frétt mbl.is eru töskurnar sjö sem stolið var úr peningaflutningabíl við Hamraborg í gærmorgun komnar í leitirnar en það var vegfarandi sem átti leið um Esjumela eftir hádegi í gær, sem gekk fram á töskur sem þjófarnir með sér eftir þjónaðinn.
Vegfarandinn fann fjórar töskur en í myndskeiði sem birtist á mbl.is sést að þjófarnir hafi sagað göt á töskurnar til að sækja peningana. Talið er að skúrkarnir hafi stolið um 20 til 30 milljónir króna.
Að sögn Heimis Ríkarðssonar, lögreglufulltrúa hjá lögreglunni í Kópavogi, sem ræddi við mbl.is eru töskurnar alls sjö en þrjár þeirra fundust í Mosfellsbæ en í tveimur af þessum sjö töskum voru enn peningar.
Búnar litasprengjum
Samkvæmt fréttatilkynningu frá Öryggismiðstöðinni voru litasprengjur í töskunum sem springa ef reynt er að opna þær.
Öryggismiðstöðin var rétt í þessu að senda frá sér fréttatilkynningu en þar staðfestir fyrirtækið að innbrotið í verðmætaflutningsbifreið hafi verið gert í bifreið á vegum Öryggismiðstöðvarinnar.
Hinar 20 til 30 milljónir króna sem stolnar voru úr bifreiðnni voru í sérhæfðum læstum verðmætatöskum sem búnar eru litasprengjum sem eyðileggja verðmæti ef tilraun er gerð til þess að nálgast þau, að því er fram kemur í fréttatilkynningunni. Þar segir einnig að öll verðmæti í flutningi fyrirtækisins séu tryggð gagnvart viðskiptavinum þess. „Megin áhersla í öryggisþjónustu er lögð á öryggi starfsmanna, þarna var starfsfólki ekki hætta búin þar sem um innbrot var að ræða en ekki rán,“ segir í tilkynningunni.