Í janúar veiktus tveir einstaklingar vegna Listera monocytogenes, sem nýverið fannst í skinkuáleggi frá Stjörnugrís.
Sjá einnig: Mast innkallar skinku: „Áhættuhópar eru barnshafandi konur, ófædd og nýfædd börn“
Á dögunum sagði Mannlíf frá því að Matvælastofnun afturkallaði, í samráði við Stjörnugrís, nokkrar tegundir af skinkuáleggi frá Stjörnugrís, eftir að sýkillinn Listeria monocytogenes greindist í tveimur sýnum. Stuttu síðar greindist sýkillinn í þremur sýnum til viðbótar. Kemur þetta fram í skriflegu svari Matvælastofnunar til Mannlífs.
„Stjörnugrís hóf innköllun á skinkuáleggi 19. febrúar þar sem sýkillinn Listeria monocytogenes greindist í tveimur sýnum sem voru sett í rannsókn. Fáum dögum seinna greindist sýkillinn í þremur fleiri skinkuáleggs-sýnum og tók þá framleiðandi ákvörðun um að innkalla þær lotur og mun fleiri, einnig lotur þar sem ekki hafði fundist sýkill en sem voru framleiddar á svipuðum tíma. Matvælastofnun hefur fylgt innkölluninni eftir eins og vera ber.“
Mannlíf spurði út í útbreiðslu sýkilsins og hversu algengt það er að hann greinist í mönnum hér á landi en sýkillinn getur leitt til alvarlegra veikinda og jafnvel dauða. Mast svaraði því til að hann greinist annað slagið hér á landi en árið 2018 veiktust fjórir alvarlega af honum. Þá veiktust tveir vegna sýkilsins í janúar á þessu ári.
„Listería monocytogenes er mjög útbreidd í náttúrunni og getur fundist í ýmsum tegundum af matvælum eins og til dæmis kjötáleggi. Sýkillinn drepst við suðu eða steikingu. Matvælaframleiðendur eru með innra eftirlitskerfi sem á að hindra að hann berist í matvælin en engu að síður finnst hann stundum í matvælum. Árið 2018 greindist hann þó nokkrum sinnum í matvælum tilbúnum til neyslu og það ár voru einnig 4 sjúklingar sem veiktust alvarlega vegna sýkilsins. Síðan þá hefu sýkillinn greinst 1 – 2 á ári í matvælum tilbúnum til neyslu á Íslandi. Sýkillinn greinist annað slagið hjá fólki og þá helst einstaklingum með bælt ónæmiskerfi. Í janúar tilkynnti landlæknir um tvo einstaklinga sem voru veikir vegna Listeria monocytogenes.“