Blaðamaðurinn og rithöfundurinn Valur Gunnarsson segir von hafa kviknað í Úkraínumönnum vegna gagnsóknar gegn Rússum.
Mannlíf heyrði í Vali sem hefur dvalið í Kharkiv í Úkraínu undanfarið og spurði hann út í stemmninguna meðal heimamanna.
„Tja, það var algert fjölmiðlablakkát fyrstu vikuna eftir að sóknin hófst og engin vissi neitt. Síðan koma fréttir af miklum sigrum,“ svaraði Valur og hélt áfram: „Fólk er búið að vera að undirbúa sig undir stríðsvetur og nú er kannski einhver von um að það verði ekki.“
Valur segir að þegar Kherson verði frelsuð „muni Rússar sjá fram á tilgangsleysi stríðsins.“
Þá bætti hann við: „En Pútín má ekki við því að tapa og stríðið mun líklega halda áfram meðan hann er við völd. En ætli hann tóri fram að 70 ára afmælinu eftir þrjár vikur?“