Lögreglan rannsakaði mál þar sem hópur manna er grunaður um að hafa brotið kynferðislega á þroskahamlaðri konu. Málið er nú á borði héraðssaksóknara.
Samkvæmt heimildum Mannlífs var karlmaður sem starfað hafði sem verslunarstjóri í þekktri verslunarkeðju, nýlega rannsakaður af lögreglunni vegna gruns um kynferðisbrot gegn þroskahamlaðri konu sem starfaði í versluninni. Ævar Pálmi Pálmason aðstoðaryfirlögregluþjónn hjá kynferðisbrotadeild lögreglunnar á höfuðborgarsvæðinu staðfesti við Mannlíf að mál af þessu tagi hafi verið rannsakað og síðan sent til héraðssaksóknara og að fleiri sakborningar hafi verið rannsakaðir í tengslum við málið.
„Já, það voru fleiri en einn sakborningur í þessu máli. Rannsóknin þróaðist í þá átt að það voru fleiri menn sem fengu réttarstöðu sakborninga,“ segir Ævar Pálmi, aðspurður hvort fleiri karlmenn hafi tengst brotunum.
Heimildir Mannlífs herma að karlmaðurinn sem upphaflega var rannsakaður hafi um árabil starfað sem verslunarstjóri þekktrar verslunar en nýverið tekið við verslunarstjórastöðu í annarri stórri verslun. Hann hafi hins vegar verið rekinn þaðan um leið og málið kom upp.