Allmargir netverjar deila nú, á samfélagsmiðlinum Facebook, hlekk undir yfirskriftinni „Ég rak Bjarna – Ætlar þú að reka hann líka?“. Á bak við færsluna standa samtökin Við fólkið sem gefur sig út fyrir að vera andófs- og mótmæla hópur sem veitir stjórnvöldum í landinu andspyrnu.
Ástæðu „hópuppsagnar“ Bjarna Benediktssonar fjármálaráðherra er að finna í Íslandsbankasölunni. Þá segir á síðu samtakanna:
„Þú seldir vinum þínum eigur okkar á allt of lágu verði. Þér var treyst en þú ert ekki traustsins verður. Þú ert rekinn sem fjármálaráðherra. Gangi þér vel að finna aðra vinnu.“
Þar fyrir neðan má ýta á hnapp sem á er ritað: „Reka Bjarna Ben“ Eftir að ýtt hefur verið á hnappinn birtist undirskrifar form þar sem óskað er eftir nafni, netfangi og kennitölu. Tekið er fram að kennitölurnar séu hafðar til að sporna við tvískráningum og til áræðanleika.
Tæplega 1900 manns hafa nú ýtt á hnappinn og þar með rekið fjármálaráðherra Íslands.
Á heimasíðu samtakanna Við fólkið segir:
„Við, fólkið í landinu krefjumst þess að stjórnvöld fari að vilja almennings í öllum mikilvægum málum, stjórni í takt við afstöðu mikils meirihluta fólks en þjóni ekki einungis hagsmunum hinna fáu.
Við viljum búa við lýðræði.
Við, fólkið í landinu er andófs- og mótmælahópur sem mun veita stjórnvöldum andspyrnu þegar þau fara augljóslega gegn almannavilja. Félagsgjöld eru 5.000 kr. á ári og eru þau nýtt til að greiða kostnað við ýmiskonar mótmæli. Þau sem skrá sig í félagið fyrir 17. júní teljast stofnfélagar.“