Flokkur fólksins segja yfirvöld hafa laumað lagabandormi inn rétt fyrir þinglok síðasta árs, sem svipti þúsundum lífeyrisþega sem búa erlendis, lögbundnum persónuaflsætti. Það sé aðför að lífeyrisþegum sem flúið hafa fátækt á Íslandi.
Fréttatilkynning barst fjölmiðlum í morgun frá Flokki fólksins þar sem farið er yfir hugmyndir ríkisstjórnarinnar um að hafa af lífeyrisþegum sem búa erlendis, persónuafsláttinn sem nemur allt að 65.000 krónum á mánuði. Flokkurinn náði fyrr í vetur að fresta gildistöku ákvæðisins um eitt ár og hafa nú lagt fram frumvarp sem fellir lagabreytinguna algjörlega úr gildi.
Fréttatilkynninguna má lesa í heild sinni hér:
Aðför að lífeyrisþegum sem flúið hafa fátækt á Íslandi
Rétt fyrir þinglok síðasta árs laumuðu stjórnvöld inn í lagabandorm um gistináttaskatt o.fl., ákvæði sem sviptir þúsundir lífeyrisþega búsetta erlendis lögbundnum persónuafslætti, sem nemur nú 65.000 krónum á mánuði.
Hér er um að ræða allt að 30 prósent tekjuskerðingu fyrir hóp sem hefur í mörgum tilvikum neyðst til að flytja af landi brott vegna sárrar fátæktar hérlendis. Þingmenn Flokks fólksins vöktu athygli á þessari aðför fyrr í vetur og náðu að fresta gildistöku ákvæðisins um eitt ár, enda var það illa ígrundað og engin greining lá fyrir um áhrif þess.
Til að koma í veg fyrir að þetta ákvæði taki gildi um næstu áramót hafa þingmenn Flokks fólksins nú lagt fram frumvarp sem fellir lagabreytinguna úr gildi. Það er óboðlegt að stjórnvöld séu enn að reyna að hrifsa persónuafslátt af bláfátæku fólki sem hefur kosið að flýja land með fótunum, þrátt fyrir að það standi í skilum með alla skatta og skyldur á Íslandi.