Önnur tilraun gerð til að bjarga sögufrægu húsi.
Reykjavíkurborg leitar að öðrum leigutaka að Sunnutorgi en húsið stendur við Langholtsveg og hefur verið eitt fallegasta kennileiti Laugardals í marga áratugi. Húsið hefur staðið autt í tæp sex ár. Undanfarin sex ár hefur húsið hins vegar verið í niðurníslu og svartur blettur á svæðinu. Reykjavíkurborg mun ekki leggja til pening við framkvæmdir sem þarf að gera til að laga húsið takist að finna leigjanda.
„Við gerum ekki ráð fyrir að Reykjavíkurborg sé að fjárfesta mikið þarna, enda er þetta ekki húsnæði sem við ætlum að nýta sjálf. En við höfum helst viljað, bæði upp á söguna, þetta er náttúrulega orðið hátt í 65 ára gamalt hús og teiknað af Sigvalda Thordarson. Við höfum helst viljað sjá komast líf í þetta hús þó það sé orðið illa farið. Það styttist líftíminn ef við förum ekki að gera eitthvað,“ sagði Óli Hertervig, skrifstofustjóri hjá Reykjavíkurborg, um málið í samtali við RÚV.
Óli vill hvetja fólk til að hafa samband við borgina um starfsemi í húsinu.
„Bara komið með frábærar hugmyndir. Við skoðum allt.“