Völvublað Mannlífs er komið út. Til þess að lesa spá völvunnar um komandi ár í heild sinni er hægt að nálgast blaðið hér.
Fjölmiðlar
„Davíð Oddsson hættir sem ritstjóri Morgunblaðsins á árinu. Miðillinn mun hagnast á brotthvarfi hans og byrja hægt og rólega að endurnýja sig. Nýtt fólk stígur til metorða á Morgunblaðinu og miðlinum mun ganga betur í kjölfarið.
RÚV er ekki að halda nægilega vel utan um starfsfólk sitt. Enn fleiri munu segja skilið við ríkisfjölmiðilinn á nýju ári og hann veikist með brotthvarfi fleira lykilfólks. Launamál hjá RÚV komast í brennidepil. Fólkið sem hverfur á braut hrökklast út ósátt og kvíðið. Meira verður um kulnun þar innanhúss á árinu. Í framhaldinu verður einhver endurnýjun innanhúss.
RÚV verður á auglýsingamarkaði eins og áður þrátt fyrir gagnrýni og heldur þannig sinni yfirburðastöðu.
Vinsældir RÚV hjá almenningi halda þó áfram að vera nokkuð miklar og unga fólkið sækir í miðilinn í auknum mæli. RÚV heldur áfram á þeirri vegferð að endurnýja sig og verður sífellt ferskari miðill sem höfðar til yngri aldurshóps.
Ég sé Loga Bergmann Eiðsson lenda í einhverjum vandræðum á nýju ári. Hann verður mikið á milli tannanna á fólki. Það er eins og það komi eitthvað í ljós í tengslum við hann. Ég sé aðra manneskju nálægt þessu. Ég sé því miður ekki nákvæmlega hvað þetta er eða hvernig þetta mun enda, en mér sýnist geta brugðið til beggja vona hvað málalyktir varðar hjá Loga Bergmann í þessu máli.
Helgi Seljan er, eins og frægt er orðið, einn þeirra lykilmanna sem hafa horfið af skjáum landsmanna undanfarin misseri. Hann þurfti á veikindaleyfi að halda eftir það mikla álag sem hann var undir eftir að hafa afhjúpað ámælisverð viðskipti Samherja í Namibíu. Í haust opnaði hann sig síðan um það mikla áreiti og árásir sem hann mátti þola frá Samherjamönnum í kjölfarið. Hann talaði við sama tilefni opinskátt um andleg veikindi sín.
Árið 2022 verður stórt ár í lífi Helga og hann mun rísa á ný. Hann er núna staddur í miðri endurfæðingu – segja má að hann sé núna eins og fuglinn Fönix, að steypa sér í eldinn, áður en hann endurfæðist síðan upp úr öskunni. Hann er að endurskoða allt um þessar mundir. Í apríl kemur augnablikið þar sem hann byrjar að rísa upp og átta sig á því hvað hann þarf að gera og hvert hann vill fara. Hann mun endurskoða leiðina sína og að endingu feta nýja braut sem verður honum mikið gæfuspor. Þetta eru virkilega spennandi og öflugir tímar.
Stundin mun áfram fletta ofan af spillingu og vinna úr stórum og miklum málum á árinu. Ég sé þau einna helst verða með fleiri stór ofbeldismál á næstunni.
Í fjölmiðlum almennt verður dýravernd meira áberandi og hulunni verður svipt af fleiri málum er varða slæma meðferð á dýrum á Íslandi. Sömuleiðis munu loftslagsmál fá stærri sess í umfjöllun.“