Norska lögreglan rannsakar brottnám á þremur börnum frá íslenskum föður. Flest bendir til þess að aðgerðin hafi verið þaulskipulögð. „Þeir vilja vera á Íslandi,“ segir konan.
Íslensk móðir er talin hafa numið þrjá syni sína á brott af heimili föður þeirra í norskum bæ og flutt þá með einkaflugvél til Íslands í gær. Faðir drengjanna, sem einnig er íslenskur, fer með forræði barnanna og má móðirinn eingöngu hitta börn sín í sólarhring á ári. Stundin greindi fyrst frá málinu.
Í frétt miðilsins kemur fram að drengirnir hafi verið búsettir í smábæ í suðurhluta Noregs en faðirinn hafi uppgötvað brotthvarf þeirra um klukkan fjögur í gær.
Loks eru drengirnir „heima“
Móðirin birti fyrir skömmu færslu á Facebook-síðu sinni þar sem að hún fagnaði 11 ára afmælisdegi elstu drengjanna, sem eru tvíburar, og sagði hann hafa verið óvenjulegan en loks séu drengirnir „heima.“ Móðirin birti einnig myndir af fjölskyldunni í einkaþotunni á leið til Íslands.
„Eftir langan undirbúning, vangaveltur og ráðfæringar við fagfólk þá var eina niðurstaðan að sækja skytturnar okkar. Langþráður dagur fyrir krakkana sem hafa ekki hist í næstum þrjú ár. Það er ótrúlegt að einhver reyni að réttlæta aðskilnað systkina, hvað þá aðskilnað barna frá foreldri sem hefur ekkert viljað nema eðlilega samveru barnanna við fjölskylduna og heilbrigt umhverfi fyrir þau að alast upp í. Slagurinn sem er framundan miðast að því að tryggja systkinunum gott líf og bjarta framtíð með þeim sem elska þau mest. Réttur strákanna til eðlilegrar umgengni við foreldra, réttur þeirra til áhyggjulausrar æsku og öruggs umhverfis hefur verið virtur að vettugi. Það hefur ekki verið hlustað á þá. Þeir vilja vera á Íslandi, þeir vilja fá að vera börn og þeir vilja eiga frjáls samskipti við sína nánustu, ekki undir eftirliti ókunnugs fólks,“ skrifaði móðirin í færslunni.