Fyrir tólf dögum fór bandaríski leikarinn Jared Leto með hópi fólks í þögla hugleiðslu úti í eyðimörk, án síma eða annarrar tengingar við umheiminn. Hann hafði því ekki heyrt af útbreiðslu kórónafaraldursins Covid-19 í Bandaríkjunum fyrr en í gær og er að vonum steinhissa á þeim breytingum sem orðið hafa í heiminum á þessum stutta tíma.
Jared birti tíst um málið á Twitter-prófíl sínum eldsnemma í morgun og segist hafa komið inn í gjörbreyttan heim að eyðumerkurdvölinni lokinni.
„Ég er agndofa – svo ekki sé meira sagt.“
„Í gær gengum við inn í gjörbreyttan heim,“ segir hann eftir að hafa greint frá því að hann hafi verið sambandslaus við umheiminn síðustu tólf dagana. „Heim sem aldrei verður samur. Ég er agndofa – svo ekki sé meira sagt.“
Leikarinn segist vera í óða önn að afla sér upplýsinga um málið frá vinum og fjölskyldumeðlimum um allan heim og klikkir út með því að senda jákvæða orku til fylgjenda sinna og biðja þá að halda sig innandyra.
„Vona að allt sé í lagi með ykkur og ykkar fólk. Sendi jákvæða orku til allra. Verið inni. Verið örugg.“ segir leikarinn ástsæli að lokum.
Wow. 12 days ago I began a silent meditation in the desert. We were totally isolated. No phone, no communication etc. We had no idea what was happening outside the facility.
— JARED LETO (@JaredLeto) March 17, 2020