Jóhann nokkur kastar hálfgerðri jólabombu inn á Matartips hópinn á Facebook. Honum hugnast alls ekki að Ölgerðin sé hætt að framleiða Hvítöl.
„Annað árið í röð sem við fáum ekki Hvítölið frá Ölgerðinni. Hvítölið hefur verið hefð á mínu heimili síðan ég man eftir mér og þessvegna finnst mér það miður að Ölgerðin láti hagnaðarsjónarmið ráða þegar kemur að jólahefðum. Ég hef í kjölfarið ákveðið að neyta bara Coka Cola með jólamatnum þetta árið.“
Færsla Jóhanns hefur vakið sterk viðbrögð hópmeðlima en sitt sýnist hverjum. Á meðan sumir taka undir orð hans um Hvítölið, gera sumir grín að færslunni og enn aðrir benda á lausnir. Svo eru það nokkrir sem beinlínis reiðast.
Linda tekur undir orð Jóhanns en segir að aðdáendur Hvítöls þurfi ekki að örvænta. Skarð ölsins megi fylla. „Ekki að það bæti hvítöls skortinn er sammála um að það er ömurlegt að þeir hættu framl., en danska hvítölið sem Bónus selur er mjög gott.“
Inga bætir kvörtun við færsluna, svona þar sem það var hægt.
„Hvað þá þessa vitleysu að vera bara með sykurskert jólaöl í dós, og hætta þessu venjulega og ekki hvítöl til að getað blandað bara sjálf, alveg fyrir neðan allar hellur í þeirra starfs „gildum“ er áræðanleiki og að viðskiptavinir geta treyst á þá – alls ekki lengur.“
Upp úr þessari athugasemd Ingu hefst aukaþráður um sannleiksgildi þessarar staðhæfingar hennar að aðeins sé nú boðið upp á sykurskert jólaöl í dós. Nokkrir segjast hafa séð sykurfullar dósir af jólaölinu nýlega en Inga þaggar niður í þeim með því að birta skjáskot af samtali við starfsmann Ölgerðarinnar þar henni er tjáð að framvegis verði dósirnar sykurskertar.
Heiða er heldur kaldhæðin í sinni athugasemd sem sló í gegn.
„Vá hvað fólk hefur það gott þegar framleiðsla einkafyrirtækja er áhrifavaldur í lífi þess.“
Íris spyr spurningu sem sjálfsagt margir vildu spyrja en þorðu ekki. Jóhann svaraði ekki þeirri spurningu.
„Á Ölgerðin að halda áfram að framleiða hvítöl með tapi af því það er ein af þínum jólahefðum?“
Elvar gerir stólpagrín að þessu öllu. Vonum að svarið sé jú.
„Ætlar engin að hugsa um börnin?“
Irma stillir upp þessu fyrsta heims vandamáli við hliðina á fátæktarvandanum.
„Sumir hafa ekki efni á að kaupa jólamat en endilega kvartaðu yfir öli sem þú drekkur örfáa daga á ári.“
Jóhann svarar og spyr hvað fátækt kemur Hvítölsskorti við.
„Mér leiðist bara svona forréttinda kvart, ef þú ert búinn að tala við Ölgerðina þá geturðu varla gert meira right?“
Jóhann svarar aftur.
„Við erum að tala um jólahefðir eithvað sem ölgerðin keyrir á í auglýsingum fyrir jólin…“
Spennandi verður að sjá hvort Hvítölið snúi aftur þegar Ölgerðin sér tapið sem fyrirtækið verður fyrir eftir að Jóhann byrjar að versla sér Coke Cola með jólamatnum.