Fyrrverandi forsætisráðherra segir umræðu vegna frumvarps um þungunarrof komna út í öfga og hreina vitleysu. Hún leggur til að málið verði látið bíða til næsta þings. „Vonandi verður þá mesta geðshræringin yfirstaðin og hægt að ræða málið af meiri yfirvegun,“ segir Jóhanna.
„Auðvitað er það stórt og mikið tilfinningamál að auka rétt kvenna lil þungunarrofs, en umræðan um málið á Alþingi er gengin útí algjörar öfgar og komin út í hreina vitleysu, engum til sóma.“
Skömmu eftir að fyrrverandi kallaði eftir meiri yfirvegun sendi formaður Flokks fólksins fjölmiðlum myndir af íslenskri stúlku fæddri á 23. viku meðgöngu sem lið í andstöðu gegn frumvarpinu. „Vegna fóstureyðingarfrumvarpsins sem nú býður atkvæðagreiðslu Alþingis, sendi ég ykkur þessar myndir með vitund og vilja foreldra þessarar litlu stúlku,“ segir í tölvupóst Ingu Sæland, formanni Flokks fólksins. Meðfylgjandi eru myndir af stúlkunni agnarsmárri og nýfæddri á spítala. Að auki eru myndir af stúlkunni í dag skælbrosandi og að því er virðist við góða heilsu.
Frumvarp um þungunarrof er nú í þriðju umræðu á þingi. Fylkingar hafa myndast á þingi með og á móti málinu. Helst er umdeild sú grein frumvarpsins sem heimilar eyðingu fósturs á tuttugustu og annarri viku þungunar. Raunar hefur slíkt verið heimilt hingað til en breytingin er sú að konum er nú í sjálfsvald sett hver forsenda slíkrar ákvörðunar er. Í gildandi lögum segir: „Einnig skal fóstureyðing leyfileg eftir 16 vikur, séu miklar líkur á vansköpun, erfðagöllum eða sköddun fósturs.“ Heimild þarf að sækja hjá nefnd skipaðri af Landlækni.
„Einn þingmaður ásakar þá þingmenn sem tala fyrir auknum rétti að vilja drepa barn í móðurkviði, sem er vægast sagt afar ósmekklegt. Annar ber sér á brjóst og segir þetta mesta kvenfrelsismál síðustu 100 árin sem er fjarstæða. Og sá þriðji spyr hver réttur fósturs sé til að erfa eignir, sem erfitt er að sjá að eigi erindi inn í umræðuna,“ skrifar Jóhanna Sigurðardóttir vegna málsins.
Þar vitnar Jóhanna til ummæla Brynjars Níelssonar, þingmanns Sjálfstæðsflokksins, sem hefur talað gegn frumvarpinu. Hann telur að fara þurfi fram miklu dýpri umræða um málið og lagaleg réttindi þeirra sem ekki hafa fæðst, meðal annars um rétt ófæddra barna til að erfa eignir foreldra sinna.