„No comment, no comment“ sagði Jón Baldvin Hannibalsson og harðneitaði að tjá sig frekar um þau tíðindi að máli Carmenar Jóhannsdóttur hefði verið áfrýjað til Landsréttar. Málinu gegn Jóni Baldvini var áfrýjað af ríkissaksóknara en hann var sýknaður í Héraðsdómi Reykjavíkur.
„Þetta er auðvitað léttir. Á sama tíma er ég með óbragð í munninum yfir því að þetta skuli yfirleitt hafa þótt vera tilefni til formlegrar kæru. Það er svo fáránlegt. En allavega; réttlætinu var fullnægt að lokum. Þetta er búið að taka þrjú og hálft ár,“ sagði Jón Baldvin í viðtali við Mannlíf fyrr í byrjun nóvember eftir sýknunina.
Jón Baldvin er sakaður um að hafa brotið kynferðislega á Carmen sumarið 2018 á heimili hans á Spáni en hann hafnar öllum ásökunum. „Ég stóð upp á einum tímapunkti og fór að skenkja í glösin, þá bara gerði kallinn sér lítið fyrir og byrjaði að strjúka á mér rassinn.“
Sækjandi í máli Carmenar, Dröfn Kærnested, fór fram á tveggja til þriggja mánaða skilorðsbundinn fangelsisdóm, einnig fór skipaður réttargæslumaður Carmenar fram á að hann yrði dæmdur til að greiða eina milljón króna í miskabætur.
Jón Baldvin hefur verið sakaður um mörg kynferðisbrot, yfir áratuga tímabil. Fjölmargar konur hafa deilt sögum sínum af fyrrum ráðherranum. Sögurnar eru bæði gamlar og nýjar. Elstu eru frá 13 til 14 ára nemendum Jóns er hann kenndi við Hagaskóla á sjöuna áratugnum.
Jón Baldvin neitaði alfarið að tjá sig um málið við blaðamann Mannlífs en endurtók ,,no comment“ þegar hann var spurður um afstöðu sína til áfrýjunar.