Breski hönnuðurinn Stella McCartney segir útbreiðslu kórónuveirunnar hafa haft töluverð áhrif á hugsunarhátt sinn kringum rekstur samnefnds tískumerkis sem hún á.
Stella segir í samtali við Vogue að umhverfisvernd og sjálfbærni hafi alltaf verið sér hugleikin en sérstaklega núna í ljósi aðstæðna. Hún segir að ástandið í heiminum hafi orðið til þess að hún hafi haft meiri tíma til að skoða gildi sín.
Hún segist vona að heimsfaraldurinn muni hafa eitthvað jákvætt í för með sér og kveðst hafa nýtt tækifærið til að hvetja starfsfólk sitt til að endurskoða framleiðsluferlið allt í kringum fyrirtækið.
Hún segist hafa ákveðið að kaupa ekkert nýtt hráefni í gerð sinnar nýjustu línu. „Ég ákvað að kaupa ekkert efni. Ég vil bara nota það sem er til á lager, endurvinna og vera fullkomlega umhverfisvæn. Ég ætla ekki að kaupa neitt inn,“ sagði Stella.