Mikil breyting verður fyrir kattaeigendur á Akureyri en frá og með 1.janúar 2025 verður lausaganga katta bönnuð.
Ljóst er að kettir í bænum verði ekki par sáttir með nýju reglurnar, og ekki síður eigendur margra þeirra. Lausaganga katta hefur verið gagnrýnd í þónokkurn tíma, sérstaklega á meðan varptíma fugla stendur.
Kom fram á fréttasíðunni Akureyri.net að langar umræður hafi verið um tillöguna sem hafi að lokum verið samþykkt með meirihluta bæjarstjórnar Akureyrar.
Starfa allir flokkar saman í bæjarsjórn og var málið umdeilt um nokkurt skeið.
Hljómar tillagan svo:
,,Bæjarstjórn samþykkir að endurskoða samþykktir um kattahald í Akureyrarkaupstað. Verður þá með nýjum tillögum lausaganga katta ekki heimil en sett svokallað sólarlagsákvæði inn sem er þrjú ár. Lausaganga katta verður þá ekki heimil frá ársbyrjun 2025. Þá verði einnig settur umtalsverður meiri kraftur að í að framfylgja þeim samþykktum með sérstakri áherslu á ábyrgð eigenda, skráningarskyldu og fræðslu.“
Fulltrúi Samfylkingarinnar harmar niðurstöðuna og segir að hægt að grípa til vægari aðgerða en að banna frjálsa útivist katta.
„Við hörmum þá niðurstöðu bæjarstjórnar að banna alfarið frjálsa útivist hjá kisum. Bæjarfélagið hefur lítið sem ekkert gert til að framfylgja þeim samþykktum sem nú þegar eru í gildi né látið á það reyna að breyta samþykktum í þá veru að sem flestir geti vel við unað. Hægt hefði verið að stíga það skref að heimila ekki útivistina að næturlagi og yfir varptíma fugla. Mikilvægara hefði verið að leita lausna en að grípa til banns. Fyrst grípa á hins vegar til banns hefði verið eðlilegra að setja sólarlagsákvæði, þannig að þær kisur sem nú þegar eru útikisur fái að vera það út sinn líftíma“.