Erlendir fréttamiðlar greina frá því að Kim Jong Un, leiðtogi Norður-Kóreu sé látinn, þar á meðal breski miðilinn Express og bandaríski TMZ.
Fréttamiðlum hefur ekki borið saman um það síðustu daga hvert ástandið væri á leiðtoganum, en orðrómur hafði verið á kreiki um veikindi hans, eftir að hann mætti ekki á hátíðarhöld í tilefni af afmælisdegi afa hans í síðustu viku. Almennt var leiðtoginn þó ekki talinn við góða heilsu fyrir sökum reykinga og offitu.
Reuters greindi frá því að kínversk stjórnvöld hefðu sent teymi sérfræðilækna til Norður-Kóreu til að annast Kim Jong Un. Daily Nk, suðurkóreski fréttavefurinn, greindi frá því að hann væri að jafna sig eftir hjartaaðgerð í síðustu viku. Vísaði vefurinn til ónafngreinds heimildarmanns.
Ómögulegt er að staðfesta hvort leiðtoginn er lífs eða liðinn, þar sem landamærum Norður-Kóreu var lokað í janúar vegna COVID-19 faraldursins. Engin formleg tilkynning hefur borist frá yfirvöldum.
Blaðamaðurinn Laura Bassett birti færslu á Twitter í gær um andlát leiðtogans, en er búin að fjarlægja færsluna.
