Samninganefnd Eflingar gagnvart Reykjavíkurborg hefur sent frá sér yfirlýsingu þar sem fram kemur að nefndin telur ummæli Dags B. Eggertssonar í fjölmiðlum fyrir helgi vera merki um að borgin sé tilbúin til að koma betur til móts við félaga Eflingar í þeirra kjarabaráttu.
Á vef Eflingar má sjá yfirlýsinguna í heild sinni. Þar segir meðal annars: „Í kjölfar síðasta samningafundar Eflingar og Reykjavíkurborgar hjá ríkissáttasemjara hefur Dagur B. Eggertsson borgarstjóri fjallað um framlagt tilboð borgarinnar í fjölmiðlum ásamt því að birtar hafa verið upplýsingar um tilboðið á heimasíðu borgarinnar. Í þessari umfjöllun er að finna framsetningu sem gefur til kynna að tilboðið sé nær kröfum Eflingar en í þeirri kynningu sem samninganefnd Eflingar fékk á umræddum samningafundi þann 19. febrúar síðastliðinn.“
Síðasta fundi lauk án samnings 19. febrúar. Í grein á vef Eflingar segir að fulltrúar Eflingar hafi áður bent á ósamræmi milli þess tilboðs sem borgin kynnti hjá ríkissáttasemjara þann 19. febrúar og þess hvernig tilboðinu var lýst í fjölmiðlum á sólarhringunum þar á eftir.
En Sólveig Anna Jónsdóttir, formaður Eflingar, kveðst trúa að í þetta sinn sé raunin ekki svo.
„En hvað sem því líður þá kjósum við að trúa því að hér sé ekki um að ræða markaðsmennsku eða fegrunaraðgerðir, heldur nýtt og endurbætt útspil af hálfu borgarinnar sem við erum tilbúin að líta jákvæðum augum. Ef það er réttur skilningur hjá okkur þá teljum við það mikilvægt skref í rétta átt. Við bjóðum borginni að staðfesta sameiginlegan skilning á þessu og hefja við okkur viðræður á þeim grunni, þar sem jafnframt verði viðurkennt að slíkar hækkanir þurfi einnig að ná til sögulega vanmetinna kvennastarfa utan leikskólanna, eins og við höfum alltaf krafist,“ er haft eftir Sólveigu Önnu á vef Eflingar.