Bjarni Ben fær á snúðinn

Páll Magnússon, fyrrverandi alþingismaður Sjálfstæðisflokksins, er í miklu stuði eftir að hann losnaði úr vistarbandi Sjálfstæðisflokksins. Hann hefur loksins tekið afstöðu opinberlega með andstæðingum gamla Sjálfstæðisflokksins í Vestmannaeyjum og býður sig fram sem oddvita fyrir bæjarmálafélagið Fyrir Heimaey sem felldi meirihluta Sjálfstæðisflokksins og hrakti Elliða Vignisson bæjarstjóra upp á land, til Þorlákshafnar. Vitað var að Bjarni Benediktsson, formaður Sjálfstæðisflokksins, hafði lítið álit á Páli fyrir meint svik og hélt honum frá ráðherradómi. Nú þakkar Páll fyrir sig sendir Bjarna kalda kveðju með því að vekja athygli á því að kunningi hans hafi grætt 10 milljónir króna á því að stökkva á leyniútboð Íslandsbanka og selja strax daginn eftir. Óhætt er að segja að jörðin brenni undir fótum Bjarna vegna útboðsins sem þykir einkennast af forherðingu, frændhygli og vinavæðingu ráðherrans. Óhætt er að segja að Bjarni hafi fengið á snúðinn frá sínum gamla félaga. Bjarni mun þó væntanlega standa þetta af sér eins og allt annað brall fortíðarinnar …