Þrátt fyrir að yfirvöld í Frakklandi hafi bannað alla viðburði þar sem fleiri en fimm þúsund manns koma saman í ljósi útbreiðslu COVID-19 tókst að halda tískuvikuna í París.
Útbreiðsla veirunnar setti þó strik í reikninginn á nýafstaðinni tískuvikunni. Blaðamenn og ritstjórar hættu margir við að mæta á sýningar, sumir gestir mættu með andlitsgrímur, partíum og kokteilboðum var aflýst og flestir hönnuðir frá Kína hættu við að taka þátt í tískuvikunni.
Í frétt New York Times kemur fram að skipuleggjendur margra tískusýninga létu dreifa andlitsgrímum til þeirra gesta sem ekki mættu með sína eigin grímu áður en sýningar hófust.
Sá orðrómur komst á kreik að sýningu Miu Miu yrði aflýst en sýningin var haldin samkvæmt dagskrá. Miuccia Prada, yfirhönnuður Miu Miu, tók hins vegar ákvörðun um að aflýsa eftirpartíinu sem var búið að undirbúa. Þetta er bara eitt dæmi um þá marga viðburði sem var aflýst á síðustu stundu.
Fjölmargir kusu þá að fylgjast með sýningum í gegnum streymi á Netinu og voru því margar sýningar heldur fámennar, aldrei þessu vant. Á fjölmennustu sýningunum voru um 1.000 áhorfendur saman komnir.