Nikótín-neysla kostar einstakling að meðaltali 500.000 kr. árlega. Það þýðir um milljón á ári fyrir par sem reykir. Ef parið legði reykingar af gæti það í staðinn farið í lúxus siglingu um Karabískahafið, flogið 20 sinnum fram og til baka frá Barcelona eða keypt sér smábíl fyrir sömu upphæð.
| Kostnaður : | Sígarettur | Rafrettur/veip | Nikótínpúðar |
| Á viku | 10.500 kr | 5.000 kr | 2.000 kr |
| Á mánuði | 42.000 kr | 20.000 kr | 8.000 kr |
| Á ári | 504.000 kr | 240.000 kr | 96.000 kr |
| Á ári fyrir par | 1.008.000 | 480.000 kr | 192.000 kr |
Kostnaður einstaklinga sem „veipa“ er að meðaltali 240.000 kr á ári. Fyrir þann pening væri hægt að fara tvisvar sinnum í veglegt frí til Spánar, með hótelgistingu á fjögurra stjörnu hóteli og flugfari fram og til baka. Meðal kostnaður vegna slíkrar neyslu er því hærri en við sumarfrí í sólinni eða jafnvel jólafrí á skíðum.
Úrval af vörum sem innihalda nikótín hefur aukist mikið síðastliðin ár og hafa rafrettur eða „veip“ orðið sífellt vinsælli. Þar að auki hafa nikótínpoka sem settir eru undir vör slegið í gegn, einkum meðal unga fólksins.
Mannlíf skoðaði meðal neyslu á nikótíni og hver kostnaður væri. Í ljós kom að neysla einstaklings sem notar nikótín púða eru um tvö þúsund krónur á viku, eða 8000 krónur á mánuði þegar horft er til ódýrasta púðans sem í boði er.
Það er hins vegar dýrara að veipa. Það kostar einstasklinginn að meðaltali 5000 krónur á viku eða 20.000 krónur á mánuði.
Áberandi dýrust er þó neysla á sígarettum sem kostar einstaklinginn um 10.500 krónur á viku, eða 42.000 kr á mánuði miðað við pakka á dag. Til samanburðar kostar flugfar fyrir tvo, báðar leiðir til Barcelona í lok septembermánaðar 48.000 krónur og því væri hægt að skella sér þangað mánaðarlega fyrir þá fjárhæð sem brennur upp við reykingarnar.
Sala á rafrettum hefur aukist talsvert eftir það kom á markað, einkum meðal ungs fólks. Par sem veipar eyðir um 480.000 krónum á ári. Að lokum getur par sem reykir búist við að útgjöld þeirra í sígarettur sé samanlagt um 1.008.000 kr árlega, sem er á pari við lúxus siglingu á skemmtiferðaskipi. Siglingin byrjar og endar í Miami en siglt er um Karabíska hafið, og í kring um Bahama eyjar með mat og allri þjónustu inniföldu í verði.