Ungir skólakrakkar, allt niður í 9 ára gamlir virðist vera, hvetja hvern annan til að horfa á klám. Kennarar og starfsmenn félagsmiðstöðva sem Mannlíf ræddi við segja krakkana nýta lausar stundir til klámhorfs í símum sínum og spjaldtölvum.
Umræða um vandann skapaðist í hópi íbúa í Grafarvogi þar sem áhyggjufull móðir póstaði færslu þess efnis að ungur sonur hennar hafi verið að skoða klám eftir hvatningu þess efnis frá skólasystkinum. Hún hvetur alla foreldra til að fylgjast með snjalltækjum barnanna til að koma í veg fyrir að þau séu að horfa þar á óæskilegt efni.
Þóranna Rósa Ólafsdóttir, skólastjóri Rimaskóla, staðfestir í samtali við Mannlíf að hér er á ferðinni mikið vandamál meðal nemenda í dag. Hún er að undirbúa orðsendingu til foreldra vegna málsins og þar verður meðal annars komið inn á hvernig foreldar geti fylgst með og lokað á klámhorf barnanna.
„Ég man eftir þessu í gamla daga þegar krakkar komu með svona blöð í skólann en nú er þetta komð í starfrænt og aðgengilegra form. Það er ofboðslega mikil markaðsetning á þessu efni til barnanna okkar. Ég hef fengið tölvupósta núna og því ætlum við að ítreka til foreldra að vera vakandi. Þetta er svakaleg glíma og mikið áhyggjuefni í samfélaginu,“ segir Þóranna.