Kristín Eysteinsdóttir leikhússtjóri Borgarleikhússins hefur óskað eftir að láta af störfum sem fyrst hjá leikhúsinu, einu og hálfu ári áður en starfstímabili hennar á að ljúka.
Sjá einnig: Kristín vill hætta sem fyrst
Í færslu sem Kristín skrifar á Facebook í dag segist hún ekki hafa lært meira af nokkru starfi og hafa eignast vini sem munu fylgja henni alla tíð, en Kristín hefur gegnt stöðu Borgarleikhússtjóra í sex ár.
„Ég hef alltaf lagt ríka áherslu á það í mínu starfi að fylgja innsæinu, hlusta á hjartað og gera hlutina alla leið með metnað og gleði að leiðarljósi. Aðeins þannig getur listin blómstrað,“ segir Kristín, en segist núna finna það í hjarta sínu að komið sé að tímamótum og hún hafi ríka þörf fyrir að skapa eitthvað nýtt.
Kristín segir hugrekki mikilvægt bæði í listinni og lífinu: „En það er ekki nóg að vera hugrakkur í listinni, maður verður líka að vera það í lífinu sjálfu og taka nýjum tækifærum og áskorunum með opnum örmum.“
Kristín segist full þakklætis fyrir árin í Borgarleikhúsinu og stíga með eftirvæntingu inn í þau verkefni sem bíða hennar.