Samfélagsskýrsla Krónunnar var birt í fyrsta sinn á dögunum. Kom þar meðal annars fram hvaða árangri verslunin hefur náð í málum er lúta að endurvinnslu og endurnýtingu. Jafnframt var þar greint frá áformum Krónunnar um að endurvinna allt það plast er til fellur í versluninni og verður það gert í samstarfi við plastendurvinnsluna Pure North Recycling í Hveragerði og Plastplan í Reykjavík.
Eftirtektarverðasta skýrslan
Í gær, þann 9. júní, hlaut Krónan viðurkenningu fyrir skýrsluna en viðurkenningin er samstarfsverkefni Festu – miðstöðvar um samfélagsábyrgð, Stjórnvísi og Viðskiptaráðs Íslands. Þetta er í þriðja sinn sem viðurkenningin er veitt. Hugsunin að baki henni er að hvetja fyrirtækin í landinu til að setja sér markmið sem hægt er að mæla og sýna fram á hvernig markmiðin skila sér í formi samfélagsábyrgðar og sjálfbærni í rekstri. Aukinheldur hvaða ávinningur er af markmiðunum fyrir samfélagið.
Að þessu sinni bárust 27 tilnefningar og hlutu 19 skýrslur tilnefningu. Þótti skýrsla Krónunnar bera af og í rökstuðningi dómnefndar kemur m.a. fram að fyrirtækið líti á sig sem mikilvægan þátttakanda í samfélaginu og hafi sýnt í verki að í krafti stærðar sinnar geti það haft áhrif til góðs í samfélaginu.