Matarboðið er 54 prósent dýrara í Heimkaup en í Bónus og Krónunni. Þetta kemur fram í verðkönnun verðlagseftirlits ASÍ sem var framkvæmd þann 15. febrúar síðastliðinn.
Verðlagseftirlitið setti saman vörulista með vörum sem þyrfti að kaupa til að halda matarboð þar sem boðið væri upp á lambalæri með sósu, kartöflugratíni og salati. Í forrétt væri rækjukokteill og eplapæ í eftirrétt. Lægsta kílóverð fáanlegt af hverri vöru í verslununum var skráð og til að auðvelda verðsamanburð var gert ráð fyrir að jafn mikið magn væri keypt í öllum verslununum. Í raunveruleikanum eru þó stærðir á pakkningum ólíkar sem hefði áhrif á verð vörukörfunnar en þá yrði afgangur af sumum þeirra vara sem keyptar yrðu inn, sem væri hægt að nýta seinna.
Nú var meiri munur á verði milli verslana en áður en í þetta skiptið var áhersla lögð á að bera saman lægsta kílóverð á vörum.
Meðalverð á 113 vörutegundum var lægst í Bónus, að meðaltali 6 prósent frá lægsta verði en hæst í Iceland, að meðaltali 54 prósent frá lægsta verði. Í um helmingi tilfella var yfir 60 prósent munur á hæsta og lægsta verði eða í 57 tilfellum af 113 og þar af var yfir 100% munur á hæsta og lægsta verði í 32 tilfellum.
Krónan og Bónus voru með lægsta meðalverðið á matarkörfunni. Lægsta verð á matarkörfunni er það verð sem fæst með að leggja saman verð á þeim vörum sem ódýrastar voru, burtséð frá því hvar þær fengust og til að fá það verð þyrfti að fara í margar verslanir.
Nettó var að meðaltali 17 prósent frá lægsta verði, Hagkaup og Kjörbúðin 28 prósent frá lægsta verði og Fjarðarkaup 32 prósent. Heimkaup var með hæsta verðið á matarkörfunni sem var að meðaltali 60 prósent frá lægsta verði og Iceland var með næsthæsta verðið, að meðaltali 40 prósent frá lægsta verði. Bónus var oftast með lægsta verðið á vörum í vörukörfunni, á 15 vörum af 25 en Heimkaup var oftast með hæsta verðið, á 15 vörum.