„Það var bara eins og ég hefði fengið dóm,“ segir tónlistarkonan Ragnhildur Gísladóttir í samtali við Loga Bergmann í spjallþætti hans þegar hann spurði út í hvernig henni hafið liðið þegar kærasti hennar, Birkir Kristinsson hlaut dóm fyrir efnahagsbrot árið 2014.
„Þegar fólk er svona tengt, eins og eitt, þá tekur maður þetta bara í hjartað,“ segir Ragnhildur.
Sumarið 2014 var dómur kveðinn upp yfir fjórum fyrrum starfsmönnum Glitnis, meðal annars Birki sem var viðskiptastjóri hjá Glitni. Hann var dæmdur í fimm ára fangelsi en í desember 2015 mildaði Hæstiréttur dóminn og hlaut Birkir þá fjögurra ára dóm.
Ragnhildur telur málið hafa verið skilið eftir í lausu lofti og hún var mjög hissa. „Ég vissi náttúrulega að þetta var ekki rétt og ég hélt reyndar að þegar þetta var kært til Hæstaréttar að réttlætið myndi koma fram,“ útskýrir hún.
„Maður trúir varla að maður hafa þurft að fara í gegnum þetta, að hafa þurft að kyngja þessu.“