Leit að Söndru Líf Þórarinsdóttur Long hófst að nýju seint í gærkvöldi, en hennar hefur verið saknað síðan á fimmtudag, skírdag.
Leitin í nótt var tilkomin vegna ábendingar frá tveimur vegfarendum sem töldu sig sjá torkennilegan hlut í sjónum skammt frá landi. Þetta kemur fram í tilkynningu frá lögreglu.
Vegfarendurnir voru á ferð skammt frá þeim stað þar sem bifreið Söndru fannst. Lögreglan fékk tilkynninguna um klukkan 21.30 og var þá ákveðið að kalla til leitarflokka og báta frá Slysavarnafélaginu Landsbjörg, auk þess sem þyrla Landhelgisgæslunnar tók einnig þátt í leitinni.
Á þessum tíma var háflóð á staðnum og nokkur sjór þannig að gaf nokkuð upp á garðinn. Leitin reyndist árangurslaus og var henni hætt um kl. 01.15 í nótt.
Í dag er gert ráð fyrir að skipulag leitarinnar verði með sama hætti og var í gærdag, auk þess sem drónar verða nýttir til leitar ef veður leyfir.