Breski leikarinn Orlando Bloom deildi ljósmynd af nýjasta tattúinu sínu fyrr í þessum mánuði. Tattúið átti að stafa Flynn í morskóða en fyrir mistök stóð Frynn. Flynn er sonur Bloom.
Netverjar voru ekki lengi að benda leikaranum á villuna en það vantaði einn punkt upp á að það stæði „Flynn“.
Bloom neyddist því að fara aftur á húðflúrstofuna og láta leiðrétta villuna. Hann deildi mynd af tattúinu í gær og sagði að nú væri allt eins og það ætti að vera. „Hvernig getur maður gert mistök sem þessi,“ sagði hann og notaði myllumerkið #pinterestfail sem gefur til kynna að hann hefur notast við upplýsingar af samfélagsmiðlinum Pinterest við hönnun á tattúinu.
Húðflúrlistamaðurinn Balazs Bercsenyi sá um að húðflúra Bloom. Bercsenyi sagðist hafa dregið lærdóm af þessum mistökum og ætlar ekki aftur að treysta því sem viðskiptavinir hans finna á Pinterest.
Á meðfylgjandi Instagram-færslu má einnig sjá mynd af tattúi sem Bloom fékk sér til minningar um hundinn sinn, Sidi.