Lögreglan á Norðurlandi eystra hefur enn ekki svarað spurningum Mannlífs í tengslum við sprenginguna sem varð í verksmiðju Pharma Arctica á Grenivík í gær. Ekki liggur fyrir hvað olli sprengingunni en tveir starfsmenn slösuðust alvarlega og voru fluttir í kjölfarið með sjúkraflugi til Reykjavíkur. Starfsmennirnir höfðu verið að vinna með hreint bensín þegar sprengingin kom upp en sagði Þröstur Friðfinnsson, sveitarstjóri Grýtubakkahrepps, í viðtali við Mannlíf í gær að hratt hefði verið brugðist við í kjölfar slyssins.
Lögreglan á Norðurlandi eystra hefur ekki svarað spurningum Mannlífs líkt og greint var frá hér að ofan, en beindu þeir erindinu nú eftir hádegi til almannavarnadeildar Ríkislögreglustjóra
„Þú þarft að tala við almannavarnadeild. Lögreglan gefur ekkert út um þetta slys.“
Ekki náðist í Gunnar Hörð Garðarsson, samskiptastjóra almannavarna, við vinnslu fréttarinnar.