Lögreglan á Suðurlandi hefur óskað eftir því við svæðisstjórn börgunarsveita á Svæði 3 að kallaður verði bátaflokkur til öryggisleitar í og við Skötubót í Þorlákshöfn eftir að sjóblautur fatnaður, stuttbuxur, skór og sokkar, fannst í fjörunni við svokallað áburðarplan við varnargarðinn við Skötubót.
Kemur þetta fram í færslu á Facebook-síðu lögreglunnar.
Ekki er vitað til þess að neins sé saknað en rétt þykir að bregðast strax við og kanna málið vel.
Ef einhver kann skýringar á tilvist þessa fatnaðar á þessum stað er sá hinn sami beðinn að hafa samband við lögreglu í síma 444-2000, hér á facebook eða í 112.
Uppfært:
Búið er að staðfesta að fatnaður sá er um ræðir var skilinn eftir af drengjum sem voru að sulla í sjónum við Þorlákshöfn í gærkvöldi. Þeir skiluðu sér allir heim í gær og allar áhyggjur því ástæðulausar. Lögregla þakkar björgunarsveit þeirra aðkomu sem og greinargóðar upplýsingar frá vitnum.