Lögreglan rannsakar hatursglæp í Breiðholti: Hrækti á fólkið og sagði það ekki velkomið á Íslandi

„Það sem setur þó að mér mestan óhug er að atburður sem þessi eigi sér stað um hábjartan dag í landi sem kennir sig við öryggi og friðsæld,“ segir Þórunn Ólafsdóttir, vinkona múslima sem urðu fyrir árás íslenskrar konu í Breiðholti í gær.

Í dagbók lögreglunnar í morgun sagði frá því að veist hafi verið að þremur múslímskum konum í Breiðholti um kvöldmatarleytið í gær. Var lögregla kölluð á vettvang og málið rannsakað sem hatursglæpur. Frekari lýsingar á atvikinu var ekki að finna í færslu lögreglunnar.

Þórunn Ólafsdóttir lýsir málsatvikum á Facebook síðu sinni, en aðstandandi kvennanna setti sig í samband við hana eftir atvikið. Hún segir svo frá:

„Í ljós kom að árás hafði átt sér stað. Ekki þó í Sýrlandi, heldur um hábjartan dag í Reykjavík. Á hinum enda línunnar var kær vinur okkar, ráðist hafði verið fólskulega á fjölskylduna hans í jafn hversdagslegum aðstæðum og innkaupaferð í Bónus. Fjölskyldan var á leið út úr versluninni þegar kona veittist að þeim, fyrst með ókvæðisorðum en svo bætti hún í og hrækti á þau og gerði tilraunir til að rífa í hijab kvennanna, sem er þekkt aðferð hatursglæpamanna til að niðurlægja múslima. Tilefni árásarinnar var hatur í garð innflytjenda og múslima. Í landinu sem ætlaði sér að veita fjölskyldunni öruggt skjól. Árásarmanneskjan hvæsti ítrekað á fólkið að það skyldi koma sér heim og það væri ekki velkomið hér á Íslandi.“

Árásarmanneskjan hvæsti ítrekað á fólkið að það skyldi koma sér heim og það væri ekki velkomið hér á Íslandi.

Þórunn segir að fólkið hafi hringt á lögreglu sem hafi ekki séð ástæðu til að mæta á staðinn en það hafi ekki verið fyrr en hún hringdi sjálf í lögregluna sem brugðist var við. „Nú ætla ég ekki að þykjast hafa meira vit á vinnubrögðum lögreglunnar en hún sjálf, en hvernig hefði þetta mál endað ef fjölskyldan hefði ekki átt bakland sem gat gengið í málið? Hversu mörgum svona árásum heyrum við aldrei af?“

Þórunn er slegin yfir því að jafn alvarlegur atburður sem þessi geti átt sér stað um hábjartan dag á Íslandi.  Staðreyndin sé hins vegar sú að hatursorðræða, rasismi og íslamófóbía færist á aukanna á Íslandi. „Sú ógnvænlega þróun á sér margar skýringar og fjölmargir sem bera þar mikla ábyrgð – stjórnmálafólk, fjölmiðlar og fólkið sem veitir þessum hugmyndum brautargengi og fjöldinn sem lætur þær óáreittar. Hvernig samfélag viljum við eiginlega vera?“

Lögreglan rannsakar málið.