Auðbjörg Reynisdóttir hjúkrunarfræðingur hefur opnað vefsíðu í tengslum við útgáfu rafbókar sem ber titilinn Stærri en banvæn mistök. „Hún fjallar um líf og dauða yngri sonar míns Jóels, sem lést eftir vítavert gáleysi starfsmanna (röð atvika) á barnaspítala Hringsins í febrúar 2001,“ skrifar Auðbjörg um bókina á nýjum vef sínum.
Hún segir bókina einnig fjalla um lífið eftir sonarmissinn.
Auðbjörg segir bókina og sömuleiðis vefsíðuna eiga erindi við alla. Hún segir að vefsíðunni sé ætlað að verða eins konar fræðslusetur um öryggi sjúklinga. „Er sjónum beint sérstaklega að almenningi sem vill læra meira um það hvernig fólk eigi að tryggja sitt öryggi innan heilbrigðisþjónustunnar. Á vefsíðunni verða bæði góðar og óþægilegar sögur. Vonandi einnig heilræði og miðlun þekkingar milli fagfólks og sjúklinga.“
Hjúkrunarfræðingar hlustuðu ekki
Í forsíðuviðtali við Vikuna árið 2013 sagði Auðbjörg frá þeim röðum atvika á barnaspítala Hringsins sem urðu til þess að Jóel lést.
Hún sagði meðal annars frá því hvernig hún reyndi að fá frekari aðstoð lækna á barnaspítala Hringsins þegar Jóel veiktist í febrúar 2001.
Meðferð Jóels var m.a. sú að hann fékk vökva í æð en mikil uppköst ollu því að hann hafði orðið fyrir miklu vökvatapi. En Jóel hresstist ekki við það og Auðbjörg varð sífellt órólegri og vildi fá lækni til að líta á hann. „Ég kvartaði við hjúkrunarfræðingana og bað þá að sækja lækni því ég var hætt að ná sambandi við Jóel og leist hreinlega ekkert á ástandið. En ekkert gerðist og aldrei kom neinn læknir.
„Mestu mistök sem heilbrigðisstarfsfólk getur gert er að hlusta ekki á sjúklingana.“
Eftir á að hyggja þá er mín tilfinning sú að hjúkrunarfræðingarnir sem voru á vakt hafi gert ráð fyrir því að ég væri bara með allt á hreinu þar sem ég er hjúkrunarfræðimenntuð sjálf og því sett ábyrgðina ómeðvitað á mig. En skilaboð eins og þau að ég var hætt að ná sambandi við drenginn eru greinileg merki um að eitthvað alvarlegt sé að. Mestu mistök sem heilbrigðisstarfsfólk getur gert er að hlusta ekki á sjúklingana. Um hálfsjöleytið var hann sendur í sónar á höfði en læknirinn sem sá um það horfði hvorki á mig né Jóel og yrti ekki á okkur. Á þessum tímapunkti var Jóel orðinn nær meðvitundarlaus. Klukkutíma síðar hætti hann að anda og fór í dá og þá loksins fór allt í gang. Í ljós kom að sónarinn sýndi að ventillinn [sem hafði verið komið fyrir í höfði hans vegna vökvasöfnunar í höfði] var stíflaður sem þýddi að Jóel var í lífshættu, en læknirinn gerði ekkert. Þetta á ég ofboðslega erfitt með,“ sagði Auðbjörg.
Auðbjörg hefur sett af stað söfnun á Karolina Fund fyrir bókaútgáfunni, hægt er að nálgast nánari upplýsingar um söfnunina á Karolina Fund.