Ráðleggingar til ferðamanna vegan kórónaveirunnar COVID-19 hafa nú verið uppfærðar.
Þórólfur Guðnason sóttvarnarlæknir ræður nú frá ónauðsynlegum ferðum til Suður-Kóreu og Írans, auk Kína og fjögurra héraða á Norður-Ítalíu. Þá er hvatt til sérstakrar varúðar þegar ferðast er til annarra svæða á Ítalíu, Tenerife á Spáni, Japans, Singapúr og Hong Kong. Þetta kemur fram í nýrri tilkynningu sem birtist á vef almannavarnadeildar ríkislögreglustjóra og á vef landlæknis.
Þar segir hafa skuli í huga að staða mála í Evrópu vegna veirunnar breytist hratt og því gætu ráðleggingar sóttvarnalæknis breyst með stuttum fyrirvara.
Sóttvarnalæknir hefur skilgreint Kína, fjögur héruð á Norður Ítalíu (Lombardía, Venetó, Emilia Rómanja og Píemonte), Suður-Kórea og Íran sem „áhættusvæði“ þar sem miklar líkur eru á samfélagssmiti.
Þau svæði sem eru skilgreind sem „svæði með lága áhættu“, þar sem tilfellum hefur fjölgað undanfarið en minni líkur eru taldar á almennu smiti, eru önnur svæði á Ítalíu, Japan, Singapúr, Hong Kong og Tenerife (fyrir utan H10 Costa Adeje Palace hótelið).