Margrét Erla Maack strengdi áramótaheit um síðustu áramót en það gekk ekki upp.
„Að sjálfsögðu beit þetta áramótaheit mig ærlega í rassinn og nokkrum dögum eftir að þetta var prentað komst ég að því að ég væri ófrísk,“ segir skemmtikrafturinn Margrét Erla Maack aðspurð hvernig markmiðið sem hún setti sér fyrir ári hafi gengið en snemma árs sagði Margrét lesendum Vikunnar frá áramótaheiti sem hún strengdi. Þá sagði hún: „Ég setti mér áramótaheit um að kaupa ekki föt á árinu 2019. Ég held að þetta muni breyta fatakaupum hjá mér að eilífu. Ég má þó kaupa mér sokka, nærföt, sokkabuxur og búninga. Á meðan ég er í þessu átaki fæ ég mikinn innblástur úr kvikmyndum og eldri ljósmyndum og myndum.“
„…en þurfti svo að kaupa sérlegan meðgöngufatnað og svo auðvitað brjóstagjafarfatnað.“
Margrét segist hafa reynt að halda þetta út eins lengi og hún gat eftir að óléttukúlan fór að gera vart við sig. „Ég reyndi mikið að halda þetta út en þurfti svo að kaupa sérlegan meðgöngufatnað og svo auðvitað brjóstagjafarfatnað,“ segir Margrét.
Hún tekur fram að hún ætli að strengja sama áramótaheit fyrir nýtt ár. „Ég stefni þó ótrauð á að reyna aftur við þetta áramótaheit 2020 því þetta var helvíti skemmtilegt! Ég gef mér leyfi til að kaupa sokkabuxur, nærfatnað og sokka.“